ШЕБЕРХАНАДАҒЫ ШАБЫТ – БОЛАШАҚҚА БАСТАР ЖОЛ

Бүгінгі білім ордасы – тек ақпарат беретін мекен емес, ол – ой қалыптасып, тәжірибе шыңдалатын, жаңа бастамалар өмірге келетін тірі алаң. Осындай жаңашыл үрдістің айқын көрінісі – шығармашылық шеберханалардың жүйелі түрде ұйымдастырылуы. Бұл бағытта Бадамша мектеп-бөбекжай-бақшасында атқарылып жатқан жұмыстар – заманауи білім берудің нақты үлгісі.

Ақтөбе облыстық әдістемелік орталығының 2025 жылғы 25 қыркүйектегі №71 бұйрығына сәйкес білім ордасында облыстық деңгейде екі шеберхана өз жұмысын бастады.

Қазақ тілі мен әдебиеті пәні мұғалімі Жанаргүл Базарбаева жетекшілік ететін «Ұлттық құндылықтарды игерту арқылы оқу сауаттылығын дамыту» шеберханасы – өткен мен бүгінді сабақтастыратын рухани көпір. Мұнда әрбір мәтін тәрбиелік мәнге ие болса, әр тапсырма оқушының таным көкжиегін кеңейтуді көздейді. Ұлттық құндылықтарды дәріптеу арқылы жас ұрпақтың ойлау қабілетін дамыту – басты бағыт.

Ал ағылшын тілі пәні мұғалімі Гулайым Жубаниязова жетекшілік ететін «Ағылшын тілі сабақтарында оқушылардың цифрлық құзыреттіліктерін дамыту» шеберханасы – технология мен білім тоғысқан заманауи алаң. Бұл ортада оқушылар тіл үйренумен қатар цифрлық құралдарды еркін меңгеріп, ақпараттық сауаттылығын арттыруға мүмкіндік алады. Білім беру үдерісі құралға емес, мүмкіндікке айналып отыр.

Аталған бастаманың жалғасы ретінде аудандық білім бөлімінің 2025 жылғы 6 қазандағы №471 бұйрығына сай бірқатар аудандық шеберханалар да іске қосылды. Олардың қатарында дене шынықтыру пәнінің мұғалімі Жубаныш Курманбаевтың «Жеңіл атлетика – мектептегі денсаулық сақтаудың маңызды элементі» тақырыбындағы шеберханасы бар. Мұнда қозғалыстың маңызы мен оның білім сапасына әсері кеңінен қарастырылады.

Бастауыш сынып мұғалімі Жанар Тлеубаеваның шеберханасы оқытудағы жұптық және топтық жұмыстың тиімді тәсілдерін тәжірибе жүзінде көрсетеді. Бұл әдіс әр баланың жеке қабілетін ашуға мүмкіндік беріп, ұжымдық мәдениетті қалыптастырады.

Мектепалды сынып мұғалімі Айгерім Калмагамбетова бүлдіршіндердің бойына ұлттық құндылықтарды ойын арқылы сіңірудің тиімді жолдарын ұсынуда. Өйткені бала үшін ойын – таным мен тәрбиенің ең табиғи формасы.

Ал қазақ тілі мен әдебиеті пәнінің мұғалімі Гүлназ Мухамеджанова инновациялық әдістерді қолдана отырып, тіл үйретудің жаңа қырларын көрсетуде. Оның тәжірибесінде тіл – тек пән емес, тұлға қалыптастыру құралы ретінде қарастырылады.

Шеберхана жұмыстары барысында педагогтер өзара тәжірибе алмасып, тиімді әдіс-тәсілдерді іс жүзінде көрсетті. Әрбір қатысушы өзіне қажетті жаңалық алып, кәсіби дамуына серпін берген мазмұнды кездесуге куә болды.

Шығармашылық шеберхана – бұл жай ғана оқу кеңістігі емес. Ол – ізденіс пен шабыттың, тәжірибе мен жаңашылдықтың тоғысқан ортасы. Осындай игі бастамалар арқылы мектеп – өзгерістің ордасына, ал ұстаз – сол өзгерістің басты қозғаушы күшіне айналып келеді.

Элеонора БАЕНОВА,

 директордың оқу ісі жөніндегі орынбасары