ХАЛЫҚПЕН БАЙЛАНЫС – ДАМУДЫҢ БАСТЫ БАҒДАРЫ
Өткен аптада аудан әкім Нұрлыбек Унербаев жұмыс жоспарына сәйкес ауылдық округтерді аралап, тұрғындармен кездесті. Әлімбет, Ащылысай, Велихов және Кемпірсай ауылдық округтерінде өткен жүздесулер халық пен билік арасындағы байланысты нығайтып, елді мекендердің өзекті мәселелерін талқылауға мүмкіндік берді.
Кездесулер барысында ауданның әлеуметтік-экономикалық даму көрсеткіштері, инфрақұрылымды жетілдіру бағытындағы жұмыстар, алдағы жоспарлар мен міндеттер кеңінен сөз болды. Сонымен қатар тұрғындар өздерін толғандырған мәселелерді көтеріп, ауылдардың келешегіне қатысты ұсыныс-пікірлерін ортаға салды. Ашық әрі сындарлы форматта өткен кездесулерде айтылған әрбір мәселе назарға алынып, оларды шешу жолдары нақты қарастырылды.
Алғашқы кездесу Әлімбет ауылдық округінде өтті. Аудан басшысы ауыл тұрғындарымен жүздесіп, өңірдің әлеуметтік-экономикалық дамуы, инфрақұрылымды жетілдіру және алдағы жоспарлар жөнінде кеңінен баяндады. Жиын барысында көше жолдарының жағдайы, коммуналдық қызметтердің сапасы, қоғамдық орындарды абаттандыру, білім беру мен денсаулық сақтау салаларындағы түйткілді мәселелер көтерілді. Тұрғындар өздерін толғандырған сауалдарын қойып, ауылдың дамуына қатысты ұсыныстарын жеткізді. Өз кезегінде аудан әкімі әр мәселені назарға алып, тиісті мекемелерге нақты тапсырмалар берілетінін атап өтті.
Келесі кездесу Ащылысай ауылында жалғасты. Мұнда ауылдың бүгінгі тыныс-тіршілігі мен келешек даму бағыттары жан-жақты талқыланды. Тұрғындар жол сапасын жақсарту, елді мекенді көркейту, коммуналдық қызметтердің тиімділігін арттыру және әлеуметтік нысандардың жағдайына қатысты ойларын ортаға салды. Ашық форматта өткен кездесуде аудан әкімі көтерілген сұрақтарға жауап беріп, өзекті мәселелерді кезең-кезеңімен шешу жолдары қарастырылатынын жеткізді. Сондай-ақ халық тарапынан айтылған бастамалар алдағы жұмыс жоспарларына енгізілетінін баса айтты.
Велихов ауылдық округіне жасаған жұмыс сапары барысында аудан басшысы Велихов және Ақжайық ауылдарының тұрғындарымен кездесті. Басқосуда округтің әлеуметтік-экономикалық ахуалы, елді мекендердің инфрақұрылымын жаңғырту, абаттандыру жұмыстары мен коммуналдық қызмет көрсету сапасын арттыру мәселелері сөз болды. Кездесу барысында тұрғындар тарапынан айтылған ұсыныстар мен сауалдарға жан-жақты түсініктемелер беріліп, жауапты сала басшыларына нақты міндеттер жүктелді. Аудан басшысы әрбір мәселенің заң аясында қаралып, жүйелі түрде шешілуіне басымдық берілетінін айтты.
Халықпен кездесу Кемпірсай ауылдық округінде қорытындыланды. Жиында жыл басынан бері атқарылған жұмыстар сараланып, ауылдың алдағы даму міндеттері айқындалды. Тұрғындар инфрақұрылымды дамыту, жолдардың жай-күйін жақсарту, әлеуметтік нысандардың қызметін жетілдіру және күнделікті тұрмысқа қатысты бірқатар мәселелерді көтерді.
Аудан әкімі әр ұсынысқа жеке тоқталып, тиісті жауаптар берді. Сонымен қатар шешімін қажет ететін мәселелер бойынша жауапты мекемелерге нақты тапсырмалар жүктеліп, олардың орындалуы тұрақты бақылауда болатыны айтылды.
Тұрғындармен өткен бұл кездесулер халық пен билік арасындағы өзара байланысты нығайтып, ауылдық округтердің дамуына серпін беретін маңызды алаңға айналды. Ашық диалог барысында көтерілген мәселелер мен ұсыныстар алдағы уақытта жүзеге асырылатын жұмыстардың негізгі бағытын айқындауға мүмкіндік берді. Аудан басшылығы тұрғындардың пікірін әрдайым назарда ұстап, елді мекендердің әлеуметтік-экономикалық дамуын қамтамасыз ету бағытындағы жұмыстарды жалғастыра бермек.
Қарғалы-АҚПАРАТ
