ЖАСТАР АШЫҚ АСПАН АСТЫНДА БАС ҚОСТЫ
Өткен бейсенбі күні аудан жастары табиғат аясында бас қосып, Қарғалы өзенінің жағасында орналасқан демалыс орталығында «Қысқы тимбилдинг-2025» іс-шарасы өтті.
Аталмыш шара аудандық жастар орталығының ұйымдастыруымен өтіп, қысқы тимбилдингке аудан жастары белсенділік танытып, олар қысқы табиғаттың әдемілігі мен достық қарым-қатынастың маңызын сезіне білді.
Бұл шараның негізгі мақсаты – аудан жастарының басын қосып, бір арнаға тоғыстырып, олардың бос уақыттарын тиімді өткізу және де түрлі іс-шаралар мен тренингтер арқылы бір-бірімен жақсы қарым-қатынас орнату, денсаулыққа өте пайдалы қыс мезгілінде дене шынықтырып, салауатты өмір салтын насихаттау.
Шараға аудан мен ауданға қарасты округтердің де жастары белсене қатысты. Жастарымыз өзара таныстық қарым-қатынас орнатып, ұйымдастырушылар тарапынан түрлі спорттық сайыстарда бақ сынап, сондай-ақ, қызықты тренингтер, эстафеталар ұйымдастырылды.
Айта кетерлігі бұл шараға аудан әкімі Нұрлыбек Унербаев қатысып, жастарымызға қолдау білдірді.
— Жастарымыз Отаншыл, білімпаз, еңбекқор, спортты сүйетін, әділ әрі өз туған жеріне, тұрып жатырған ауылына жанашыр бола білуі қажет. Өйткені, кез келген елдің болашағы, әлеуметтік-экономикалық дамуы, мәдениеті мен құндылықтары жастарға тікелей байланысты. Бүгінгі таңда жастардың рөлі артып, олар қоғам өмірінде үлкен өзгерістер жасауға қабілетті. Сонымен қатар, сіздер, яғни жастар спортпен, дене шынықтырумен қатар, өнермен, қоғамдық жұмыстармен де белсенді айналысуларыңыз керек. Еліміздің өсіп-өркендеуіне үлес қосатын талантты, креативті жастар көбейген сайын қоғам да, өңіріміз де дамып, жаңа деңгейге көтерілеміз,- дей келе аудан басшысы тимбилдингке қатысушы жастарға сәттілік пен жақсы демалыс тіледі.
Сонымен қатар, аудандық мәдениет үйінің көркем өнерпаздары бұл шараның көркін келтіріп, концерттік бағдарлама ұсынып, көпшіліктің көңілін көтеріп тастады.
Осылайша, қысқы тимбилдинг іс-шарасы өте қызықты өтті.
-Іс-шара бағдарламасы әртүрлі деңгейде ұйымдастырылды. Нақтырақ айтар болсам, ең алдымен жастар көңілді эстафеталарға қатысып, бір-біріне қолдау көрсетіп, ойынның қызығушылығын сезіне білді. Одан соң қарда жүретін көлікпен жүріп, атпен шауып уақыттарын тиімді өткізе білді. Жалпы шара мақсатына сай қысқы табиғаттың ерекшелігі мен әсемдігін сезініп, жастар өздерінің мүмкіндіктерін байқап, топ болып сайысты. Сондай-ақ, тау баурайынан сырғанау сәті әрқайсысының жүрегін қуанышқа толтырды. Бір сөзбен айтқанда, қысқы табиғат пен таза ауада демалудың үйлесімі тимбилдингке қатысушыларға күнделікті өмірден үзіліс жасап қана қоймай, ұжымдағы таныстықты нығайтуға өз септігін тигізеді,-дейді шара ұйымдастырушысы, аудандық жастар орталығының басшысы Мейіржан Жұбан.
Расында, бұл шара жастар үшін есте қаларлықтай болды. Тимбилдингтің әр сәті аудан жастарына нағыз бірліктің, достықтың және салауатты өмір салтының маңыздылығын көрсете білді. Қарғалының әсем табиғатында өткен бұл шара аудан жастарына жаңа эмоциялар мен ұмытылмас әсерлер қалдырды. Ал аудандық жастар орталығы өз кезегінде мұндай шаралардың алдағы уақытта да жалғасын табатындығын айта келе, қатысушыларға ризашылығын білдіріп, іс-шара белсенділерін бағалы сыйлықтармен марапаттады.
Жұлдыз КЕНЖЕ
