Мемлекет басшысының қатысуымен ұстаздардың тамыз конференциясы өтті
Нұржан Шаңғытбай, «Атамекен» студенттер отрядының жастар ҚБ төрағасы
Қасым-Жомарт Тоқаевтың Республикалық тамыз конференциясындағы сөзінде мұғалімдердің қоғамдағы орны мен маңызына ерекше назар аударылып, оларды ұлттың болашағын қалыптастыратын басты тұлға ретінде бағалау маңызды әлеуметтік мәселелерді көтереді. Оның пікірінше, ұстаздар тек білім беріп қана қоймай, тұтас ұлттың зияткерлік әлеуетін қалыптастырып, елдің даму жолындағы негізгі қозғаушы күш болып табылады. Бұл көзқарас ұстаздық мамандыққа деген құрмет пен жауапкершілікті арттыруға үлкен ықпал етеді. Ұстазды «ұлттың шамшырағы» деп сипаттау — оның тек білім беру қызметін атқарушы ғана емес, сол білім арқылы ұлттың мәдени және интеллектуалдық дамуына үлес қосатын, ұрпақ тәрбиелейтін адам екенін айқындайды. Ұстаздардың басты міндеті – оқушыларды тек теориялық біліммен қамтамасыз етіп қана қоймай, оларға өмірде қажет болатын құндылықтарды, адами қасиеттерді, көшбасшылық пен жауапкершілікті де үйрету. Елдің болашағы, шын мәнінде, ұстаздың қолында. Егер ұстаз өз ісіне деген махаббат пен құштарлықпен жұмыс істесе, оқушылар да соған сай ынтамен білім алады және қоғамға пайдалы азамат болып өседі. Президенттің айтуынша, ұстаздың қоғамдағы орны бәрінен жоғары болуы тиіс. Бұл сөздер мұғалімдерге деген құрметтің, олардың еңбегіне баға берудің маңыздылығын көрсетеді. Ұстаздардың жұмысы көбінесе көрінбейді немесе оның бағасы әрқашан лайықты түрде көрсетілмейді. Сондықтан, мемлекет тарапынан мұғалімдерге қажетті әлеуметтік және материалдық қолдау көрсету арқылы олардың мәртебесін көтеру — бұл еліміздің білім жүйесінің сапасын арттырудың негізгі қадамдарының бірі. Мұғалімдер өз жұмысының маңыздылығын сезінсе, әрі қарай да өз ісіне адал, жауапкершілікті әрі шығармашылықпен қарайды.
