ҚАЛАМҒА ҚҰРМЕТ – ҚОҒАМҒА ҚҰРМЕТ

28 маусым – қоғамның тыныс-тіршілігін халыққа шынайы жеткізіп, ел үні мен халық пікірін тоғыстыратын  бұқаралық ақпарат құралдары қызметкерлерінің кәсіби мерекесі.

 Бұл – ақпарат айдынында адал еңбек етіп, елдік мүддені биік қойып, қоғамдық пікірдің қалыптасуына ықпал жасап жүрген журналистердің, баспасөз саласының барша өкілдерінің еңбегі лайықты бағаланатын ерекше күн. Өмірдің сан саласын қамтып, елдің мұңы мен қуанышын қатар өріп, уақыт шежіресін тасқа басып келе жатқан қалам иелерінің еңбегі әрдайым құрметке лайық.

Биыл бұл мереке аудандық «Қарғалы» газетінің 60 жылдық мерейтойымен тұспа-тұс келіп, қос қуаныштың сәні мен салмағын арттыра түсті. Алпыс жыл бойы ауданның шежіресін жасап, ел өміріндегі елеулі оқиғаларды хаттап, халық пен биліктің арасындағы сенімді байланыстың алтын арқауына айналған басылым үшін бұл – ерекше тарихи белес.

Сондай-ақ, бұқаралық ақпарат құралдары қызметкерлері күніне орай облыс орталығында да салтанатты іс-шара ұйымдастырылды. Облыс әкімі Асхат Шахаров журналистерді кәсіби мерекелерімен құттықтап, бұқаралық ақпарат құралдарының қоғамдағы айрықша орны мен жауапкершілігіне тоқталды. Ол журналистиканың жай ғана мамандық емес, мемлекет пен қоғам алдындағы үлкен жауапкершілік жүктейтін маңызды сала екенін атап өтті.

Салтанатты шара барысында Қазақстан Республикасы Президентінің Жарлығына сәйкес отандық журналистика мен телевизияның дамуына елеулі үлес қосқан бірқатар сала өкілдері мемлекеттік наградалармен, министрліктің марапаттарымен, Қазақстан Журналистер одағының арнайы атақтарымен, облыс әкімінің Алғыс хаттарымен марапатталды.

Қуанышты марапатқа ие болғандардың қатарында аудандық «Қарғалы» газетінің бас редакторы Камшат Байханова да болды. Ол облыс әкімі Асхат Шахаровтың Алғыс хатымен марапатталды.

Осы айтулы мерекеге орай редакция ұжымын құттықтауға аудан әкімінің орынбасары Ержан Есімбаев, ақсақалдар кеңесінің төрағасы Зинелгабдин Дербиспаев, аудандық мәслихат депутаты Надежда Заглядова, аудандық ішкі саясат бөлімінің басшысы Асхат Айжарықов, аудандық төтенше жағдайлар бөлімінің бастығы, азаматтық қорғау майоры Аслан Каркулов, «Атамекен» кәсіпкерлер палатасы филиалының директоры Жолдас Қарағұлов, аумақтық сайлау комиссиясының төрағасы Найля Қожақова, Қарғалы аудандық мемлекеттік мекемелер қызметкерлері кәсіподағы комитетінің төрағасы Райхан Рахимова және тағы да басқа ұжым басшылары мен қызметкерлері арнайы келді.

Қонақтар редакция ұжымына ақжарма тілектерін арнап, кәсіби мерекемен құттықтады. Олар аудандық газеттің ел өміріндегі маңызды рөлін атап өтіп, ұжымның тынымсыз еңбегіне ризашылықтарын білдіріп, сый-құрмет көрсетті. Жылы лебіздер айтылып, шығармашылық ұжымның алдағы жұмысына толағай табыс, шабыт пен жаңа жетістіктер тілелді.

Мерекелік жиында аудан әкімінің орынбасары Ержан Есімбаев сөз сөйлеп, аудандық газеттің өңірдің рухани өміріндегі орны ерекше екенін атап өтті.

– «Қарғалы» газеті – ауданның айнасы, ел тарихының шежіресі. Газеттің қоғамдағы орны зор. Бүгінгі 60 жылдық мерейтой ауданға ортақ қуаныш. Сондықтан да басылым ұжымына шығармашылық табыс, қажымас қайрат, жаңа жетістіктер тілеймін, – деген ізгі тілегін жеткізіп, аудан әкімі Нұрлыбек Унербаевтың Алғыс хатын табыс етті.

Өз кезегінде ақсақалдар кеңесінің төрағасы Зинелгабдин Дербиспаев та аудандық басылымның халық үшін маңызы зор екенін ерекше атап өтті. Ол газет – ұлттың рухани қазынасы, елдің өткені мен бүгінін сабақтастырып, кейінгі ұрпаққа жеткізетін баға жетпес мұра екенін айтып, басылым ұжымына ақ батасын берді.

Аудандық «Атамекен» кәсіпкерлер палатасы филиалының директоры Жолдас Қарағұлов та мерекемен құттықтап, редакция ұжымына Ақтөбе облысы кәсіпкерлер палатасының директоры Дидар Боранқұловтың Алғыс хатын табыстады.

Шын мәнінде, аудандық «Қарғалы» газеті алпыс жыл бойы өңірдің қоғамдық-саяси, әлеуметтік-экономикалық және мәдени өмірінің айнымас шежіресіне айналды. Газет бетінде ауданның жетістіктері, еңбек адамдарының тағдыры, елдік мәселелер, игі бастамалар мен тарихи оқиғалар үздіксіз жарияланып келеді. Бұл басылым – бірнеше буын оқырманның сеніміне ие болып, елдің рухани өмірімен бірге жасап келе жатқан тағылымы мол ақпарат құралы.

Гүлжазира МЫРЗАБЕКОВА