Суретші Кирилл жеңімпаз атанды

Жалпы орта және қосымша білім беру ұйымдары білім алушыларының арасында «Мен және менің тазым» атты  республикалық суреттер байқауы өтті.

Бұл сурет байқауының мақсаты — балаларды қазақтың ұлттық ит тұқымдарына деген сүйіспеншілігін тәрбиелеу, олардың шығармашылық қабілеттерін дамыту, таланттары мен қиялын көрсету, иттердің ежелгі тұқымдарымен таныстыру.

Жануарларға адамгершілік қатынасты қалыптастыру мен балалардың шығармашылық қабілеттерін дамыту мақсатындағы байқау Республикалық қосымша білім беру оқу-әдістемелік орталығының ұйымдастыруымен қашықтық форматта өткізілді.

Сондай-ақ, аталмыш байқауға жалпы орта және қосымша білім беру ұйымдарының 7-17 жас аралығындағы білім алушылары қатысып, олар 7-10 жастағы кіші жас санаты, 11-14 жастағы орта жас санаты, 15-17 жастағы жоғарғы жас санаты бойынша шығармашылық жұмыстары сараланды.

Нәтижесінде, «Мен және менің тазым» тақырыбындағы республикалық суреттер байқауында аудандық балалар өнер мектебінің шәкірті,  “Көркемсурет” бөлімінің білім алушысы Кирилл Каминский жүлделі  ІІІ орынға ие болды. Байқау ұйымдастырушысы Қазақстан Республикасы Оқу-ағарту министрлігінің «Республикалық қосымша білім беру оқу-әдістемелік орталығы» РМҚК директорының арнайы Дипломымен марапатталды.  Жас суретшіні дайындаған жетекшісі — Сания Абдрахманова.

Жұлдыз КЕНЖЕ