Бүгін облыстық мәслихаттың төрағасы Гүлқасима Сүйінтаева, мемлекеттік қызмет ардагері Сәния Қалдығұлова және облыстық мәслихаттың депутаттары мектептерді аралап, тұрғындардың хал-жағдайын білді.

26 орта мектептің директоры Талғат Ерназаров қазіргі таңда мұнда жақын маңдағы саяжайлардан көшірілген 88 адам орналасқанын айтты. Қажет болса, оқу орны тағы жиырма адамды қабылдауға дайын.
– Тұрғындарға тиісті жағдай жасалып, үш мезгіл тамақ, қосымша ас ұйымдастырылып, кезекшілерге бөлек тамақтану кестесі қарастырылған. Медициналық пункт таңғы сағат 9.00-ден кешкі сағат 20.00-ге дейін жұмыс істейді, біз барлық қажетті дәрі-дәрмектермен қамтамасыз етеміз. Бізге еріктілер де белсенді түрде көмектеседі, — дейді мектеп директоры.

Ақтөбе қаласының 45 жастағы тұрғыны Надежда күйеуімен мектепке кеше түнде келген. Жақында ота жасалған әйелге отбасына бөлме беріліп, медициналық көмек көрсетілген.
— Бәрі жақсы. Ешқандай шағымымыз жоқ, — дейді ол.
Мектептерде балалардың бос уақытын өткізуге жағдай жасалған.
Бүгінде 36 мектепке — 160, 71 мектепке 300 адам орналастырылған. Оларға да тиісті жағдай жасалған.
Гүлқасима Сүйінтаева тұрғындармен тілдесіп, олардың жағдайын сұрады. Алдағы уақытта су тасқынынан зардап шеккен азаматтарға тиісті көмек көрсетілетінін жеткізді.

Д.АЙДАР.