ЖЫЛ ҚОРЫТЫНДЫЛАНЫП, БЕЛСЕНДІЛЕР МАРАПАТТАЛДЫ

 Биылғы 2024 жыл ауданымыз үшін нәтижелі болды. Осы орайда, 20 желтоқсан күні аудандық мәдениет үйінде жарқын жетістіктер мен нәтижелі еңбекті қорытындылау мақсатында салтанатты шара өтті.

         Мерекелік шараға аудан әкімі Нұрлыбек Унербаев, аудан ардагерлері, мекеме басшылары мен қызметкерлері және де ауыл тұрғындары қатысты.

Салтанатты іс-шарада аудан басшысы көпшілікті келе жатырған Жаңа жыл мерекесімен құттықтап, биыл атқарылған жұмыстарға тоқталды.

-Өтіп бара жатырған жыл ауданымыз үшін шын мәнінде бірлік пен берекенің, жаңа жетістіктер мен мүмкіндіктердің сонымен қатар, халық қалаған, ел тілегі жүзеге асқан серпінді жобалардың орындалуымен аса құнды жыл болды. Жалпы ауданның әлеуметтік-экономикалық дамуының 2024 жылдың қорытындысы бойынша оң нәтижелерге қол жеткіздік. Бүгінгі күні ауданымыздағы елді мекендерді орталықтандырылған сумен қамтамасыз ету 93% болса, газбен қамтамасыз ету 73% құрайды. Газ мәселесін айтатын болсақ, 2024 жылы Велихов ауылдық округіне газ құбырын тарту жұмыстары басталып, жалпы ұзындығы 26 шақырымды құрайтын құрылыс жұмыстары жүргізілді. Және алдағы 2025 жылы толығымен аяқталады. Ал енді жол мәселесіне тоқталсам, облыстық маңызы бар Бадамша-Рождество автокөлік жолының 30 шақырымы жартылай күрделі жөндеуден өтіп, қалған бөлігі 2025 жылы аяқталатын болады. Аудан және ауылішілік жолдар орташа жөндеуден өтіп, жалпы ұзындығы 16 шақырым жол пайдалануға берілді. Алдағы жылы да жол жөндеу жұмыстары жалғасын табатын болады. Ақтөбе-Орск республикалық маңызы бар автокөлік жолы жөндеуден өтеді. Тағы бір маңызды мәселе аудан  орталығындағы су бұру жүйесін жаңарту жұмыстары іске асырылуда, келесі жылы толығымен аяқтау жоспарда бар. Сондай-ақ, аудан бойынша 52 тұрғын үйдің жеке құрылысы салынды. Бұл негізінен ауданымыздың көпбалалы отбасылары мен әлеуметтік осал топтардың тұрғындарын тұрғын үймен қамтамасыз етуге мүмкіндік береді. Бадамша ауылы тұрғындарының көптен күткен Өнер мектебінің құрылысы толығымен аяқталып, пайдалануға берілді.  Сондай-ақ, құрылыс жұмыстары ұзаққа созылған Дене шынықтыру-сауықтыру кешенінің құрылыс монтаж жұмыстары аяқталып, құжаттары рәсімделуде. Биыл ауа-райы қолайлы болып, ауыл шаруашылығы саласында ауқымды жұмыстар жүргізіліп, мол өнім алынып, қамбамыз астыққа толды. Әрбір қол жеткізген жетістігіміз сіздердің зор еңбектеріңіздің жемісі. 2024 жылды нәтижелі аяқтап, Қарғалы өңірінің дамуына қосқан үлестеріңіз үшін баршаңызға ризашылығымды білдіремін,-деді аудан әкімі Нұрлыбек Унербаев.

Одан соң аудан басшысы өңіріміздің өркендеуіне елеулі үлес қосып, тұрғындардың әл-ауқатын арттыруға атсалысып, өзі еңбек еткен салада жетістікке жеткен бірқатар белсенділерді марапаттап, өз атынан алғыс хаттар табыс етті.

Марапатталғандардың арасында Кемпірсай ауылдық округінің белсенді жеке кәсіпкері Ботагөз Асанова, Велихов ауылдық округінің мемлекеттік қызмет саласының ардагері Барлық Хайрашев, Әлімбет ауылдық округінің штаттан тыс қызметкері Акжан Билисбаева, Бадамша мектеп-бөбекжай-бақшасының белсенді мектеп оқушысы, облыстық, республикалық олимпиадаларының жеңімпазы Алибек Казмагамбетов, Степной ауылының белсенді тұрғыны Наталья Бойчук, Ащылысай ауылының белсенді тұрғыны Александр Пышный, Қарғалы аудандық мәдениет үйінің көркемдік жетекшісі, облыстық байқаулардың жүлдегері Жансая Даурбаева, «Ұшқын» халықтық жастар театры және «Наз» халықтық би ансамблінің мүшесі, қазақ тілі байқауларының жеңімпазы Варвара Ивахова және Бадамша ауылдық округінің белсенді қызметкері Қайрат Каюпов бар.

Сонымен қатар, салтанатты шарада ауданның ауылшаруашылық саласында қызмет атқарып, ұзақ жылдар бойы мемлекеттік қызметте жұмыс жасаған, зейнеткер, аудандық қоғамдық кеңес төрайымы Жанылсын Исмагулова мен білім саласының ардагері Лариса Ильчевскаяға «Қарғалы ауданының Құрметті азаматы» атағы беріліп, төсбелгі мен куәлікті аудан әкімі табыстады.

Сондай-ақ, ұзақ жылдар бойы «Бадамша – Сервис» КМК қызмет атқарып, халықтың алғысына ие болған Валентин Буш, ауылшаруашылық саласында қызмет еткен, ұзақ жылдар бойы ақсақалдар кеңесінің төрағасы болып қызмет атқарған Сабыржан Бисенов, көп жылдар бойы аудандық медицина саласының дамуына үлес қосқан Раиса Кайсарова, ауылшаруашылық саласының маманы, аудандағы қайырымдылық іс-шараларының белсенді қатысушысы Зайнолла Малдыбаев  «Ауданға сіңірген еңбегі үшін» төсбелгісімен марапатталды.

Қорытынды кеш одан әрі аудандық мәслихат хатшысы Сапарбек Аманжоловтың марапаттауымен жалғасты. Қарғалы аудандық мәслихатының IV, V, VI шақырылымдарының депутаты Жумабек Кольжанов Құрмет грамотасымен, ҚР Парламент сенатының алғыс хатымен Қарғалы аудандық мәслихатының III, V шақырылымдарының депутаты Иван Кудря, ҚР Энергетика министрінің алғыс хатымен Қарғалы ауданының мәслихат депутаты Аманжол Утегенов, ҚР Қаржы министрінің алғыс хатымен Қарғалы аудандық мәслихатының I және III шақырылымының депутаты, I шақырылым Қарғалы аудандық мәслихатының хатшысы Альхуат Танабергенов марапатталса, «Қазақстан мәслихаттарына 30 жыл» мерекелік төсбелгі Қарғалы аудандық мәслихатының ІІ, ІІІ, IV шақырылымдарының депутаты, хатшысы Жомарт Кульмановтың кеудесіне тағылды.

Марапаттау рәсімінен соң шара аудандық мәдениет үйі көркем өнерпаздарының мерекелік бағдарламасымен жалғасты. Өнерпаздарымыз Шәмші әндерінен попурри, т.б. түрлі әндер шырқап, домбырашылар ансамблі «Ақжелең» күйін шертіп, «Наз» халықтық би ансамблі үнді және заманауи би билеп, Дабыл Даурбаев пен  Нұрхат Көшкінбаев бірі гитарамен, бірі домбыра үнімен «Кубинский танец» композициясын орындап көпшілікті көтеріңкі күйге бөледі. Салтанатты кеш соңы мәдениет үйі әншілерінің орындауындағы «Туған ел» әнімен аяқталды.

Осылайша, санаулы күннен соң қоштасатын ұлу жылын аудан халқы табысты қорытындылады.

Гүлжазира МЫРЗАБЕКОВА