ЗЕРТХАНАШЫ УРАЗГУЛДІҢ ЕҢБЕГІ

  Расында зертханашы болу-зор жауапкершілік. Олар әр түрлі салада кезіге береді. Бір сөзбен айтқанда түйінді істі анықтаушылар. Сондай көзге түсіп, көпшілікте атала бермейтін еңбек адамының бірі – Уразгул Миргалеева.

Кейіпкеріміз 1963 жылы ақпан айында ауданымызға қарасты Шәмші Қалдаяқов ауылында дүниеге келген. Әкесі Тулек Сатканов Пацаев совхозында көлік жүргізуші, ал анасы Үміт Сатканова аталмыш ауылдың асханасында аспазшы қызметін атқарады. Уразгул  отбасындағы 5 перзенттің төртіншісі.

Ол 1970 жылы Чкалов атындағы бастауыш мектебіне қабылданып,  1978 жылы В.И. Пацаев атындағы 8 жылдық мектепті қызыл куәлікпен тәмамдап шығады. Одан соң Ақтөбе кооперативтік колледжіндегі «Өнеркәсіптік және азық-түлік тауарларын тану» мамандығына оқуға түседі. Аталмыш оқу орнын 1981 жылы аяқтап, Хромтау қаласындағы кооперативтік несие серіктестігіне сату ісінің маманы болып жұмысқа орналасады.

Осылайша 1984 жылы азаматы Толбаймен шаңырақ көтеріп, өз ауылына оралады. Одан соң жолдасы екеуі «Пацаев» ЖШС-нің   өркендеуіне аз да болса өз үлестерін қосады. Сөйтіп, Толбай өзі өскен ауылда құрылыс саласында еңбек етсе, Уразгул балабақшада бала күтушісі болып жұмыс жасайды.

Ал 2001 жылы кейіпкеріміздің тәжірибесі В.И.Пацаев атындағы орта мектебінде биология пәні бойынша зертханашылық қызметпен жалғасады. Біздің кейіпкеріміз өмір жолын басқа салада оқумен ұштастырып, еңбек еткен маман. Жалпы еңбек өтілі 40 жыл десек, соның 23 жылын бала тәрбиесіне арнаған ұлағатты ұстаз.

Өмірлік тәжірибесінде бала тәрбиесімен айналысқан зертханашының еңбегі де еленіп, алғыс хаттармен марапатталған. Сондай-ақ, жас ұрпақты тәрбиелеу мен білім беру жүйесіне қосқан үлесі үшін  «Ең үздік қызметкер» атанып, құрметке бөленген.

Бүгінде кейіпкеріміз абыройлы еңбекпен құрметті зейнетке шығып отыр. Зейнеткерлікке шығуына орай өзі еңбек еткен білім ордасы мен аудандық кәсіподақ ұйымы Түркістан қаласына жолдама сыйлаған.  Өнегелі өмір жолындағы  қос зейнеткер берекелі шаңырақ астында  өздерінен тараған 2 ұл мен бір қыздың қуанышына бөленіп, кішкентай немерелердің  шаттығына кенеліп отыр.

Бақыт ИМАШЕВ