ТӨРТ ТҮЛІКТІҢ ТІЛІН ТАПҚАН — ЕЛЕУБАЙ

Биылғы жыл жұмысшы мәртебесін көтеруге арналған жыл ретінде есте қалары анық. Біз де өлке басылымында еңбек адамдарының жетістіктерін көрсетуге атсалысып келеміз.

Осы жолғы кейіпкеріміз төрт түліктің тілін тапқан жанның бірі. Олай болса Степной ауылының тұрғыны, зейнеткер Елеубай Қиназбайұлының еңбек жолы жайында болмақ.

Кейіпкеріміз Елеубай Темирбаев 1961 жылы қараша айында қазіргі Хромтау ауданы Елуқыз шатқалы жерінде дүниеге келген.

Әкесі Қиназбай мал қабылдау пунктінде жұмыс жасап жүрген жерінен Мамыт елді мекеніне қоныс аударып, мал фермасында бригадир болып еңбек етсе, анасы Жұмабике үй шаруасымен айналысады.

Елеубай Мамыттағы 8 жылдық мектептің 1-ші сыныбына барып, 1976-1978 жылдары Көктөбе ауылындағы Болат атындағы орта мектебін бітіреді. Мектеп бітірген соң еңбек жолын  мал шаруашылығынан бастайды. Одан кейін 1978 жылы Орал қаласындағы Батыс Қазақстан ауыл шаруашылығы институтына оқуға сырттай түсіп, оны ойдағыдай аяқтап шығады.

1980-1982 жылдар арасында Волгоград қаласында әскери борышын өтеп келеді. Одан әрі Мамыт ауылындағы арнайы мал өсіру орынында  маман болып қызмет етеді. Сөйтіп, 1983 жылдың шілде айында Қарылға Нажмеденқызымен отау құрады. Мал маманы, ауыл шаруашылығы саласының бригадирі, кезінде жастарды ауылға тартуға ықпалы мол комсомол жастар бригадасының мүшесі болып қызмет еткен.

Бір сөзбен айтқанда мал шаруашылығының әмбебап маманы. 2009-2010 жылдары Мамыттағы ел үдере көшіп, ауыл ыдырай бастаған тұста Елеубайдың отбасы Степной ауылына қоныс аударады. Келген жылы ауылдағы қай жұмысты да жатсынбайтын азамат трактор бригадасында қызмет етеді. Кейіннен бригадир болып, сол жерден 2023 жылы зейнетке шығады. Зейнетке шықса да әлі күнге дейін еңбек етіп келеді.

Қазір  1  ұл, 3 қызы да ер жетіп, үйлі-баранды. Балалары  жоғары білімді ел азаматтары. Бәрі де жұмыс барысымен жан-жақта тіршілік етуде. Ұл-қызынан немере сүйіп отырған ата мен әже де бейнеттің зейнетін көргеніне ризашылық етіп, бүгінде Степной ауылдық округінде тұрып жатыр.

Бақыт ИМАШЕВ