«Күз аруы» анықталды
Ағымдағы жылдың 1 қарашасында Шәмші Қалдаяқов ауылдық клубында аудандық жастар ресурстық орталығының қолдауымен мектеп оқушылары арасында «Күз аруы – 2024» сайысы өтті.
Бұл сайысқа аудандық жастар ресурстық орталығының басшысы Мейіржан Жұбан, В.И Пацаев атындағы орта мектебінің әлеуметтік педагогы Гульмира Уразбекова, Шәмші ауылының жас кәсіпкері, тігінші, белсенді ата-ана Гульмира Акмурзина әділ бағаларын беріп, төрелік етті.
Шара барысында сөз алған жастар ресурстық орталығының басшысы өзінің лебізін білдірді.
-Бұл сайыс қыздарымызды әдептілік пен имандылыққа, ақылдылық пен сымбаттылыққа, жалпы айтқанда тәрбиеге баули отырып, өнерге деген қызығушылықтарын арттырып, сондай-ақ, олардың бойындағы жан-жақты қабілеттерін сынап көрсетуге мүмкіндіктер туғызу мақсатында ұйымдастырылып отыр. Сонымен қатар, демалыс кезіндегі оқушыларымыздың бос уақытын тиімді пайдалану. Жас ұрпақтың бойындағы ізденісін дамыту мен күз кереметін ұғындыру,- деп атап өтті М.Жұбан
Өнер байқауында қыз балалардың жан дүниесіндегі көркемдік талғамы, әдептілігі, инабаттылығы, ізеттілігі, өнерге деген қызығушылықтары насихатталып, қатысушыларымыз сайыс шартына сәйкес өнер көрсетіп, сахна мәдениеті мен шығармашылық қабілеттері арқылы көрермендерді таң қалдырды.
Осылайша, байқауда топ жарған арулар өздерінің өнерлерін ортаға салып, сахна сәнін келтіре түсті. «Сымбатты қыз сәнімен» атты кезеңінде өз қиялдарымен жасаған киім үлгілерін әділқазылар мен тамашалаушы көрермендер назарына ұсынды. Сымбаты мен сәні келіскен арулар бұл додада белсенділік таныта білді. Күз аруларының басын біріктірген өнер байқауы тартысты да қызықты өтті.
Сайыс болған соң шын жүйріктің суырылып алға шығары сөзсіз. Әділқазылар шешімімен байқау қорытындысы анықталып, нәтижесінде жүлделі І орынды Інжу Қуандыкова, ІІ орынды Диана Түгелбай, ІІІ орынды Аяжан Азанхан қанжығалады. Ал «Көрермен көзайымы» номинациясын Дания Сабирова, «Сымбатты ару» номинациясын Малика Бексұлтан, «Өнерлі ару» номинациясын Дильназ Мухамбетова иеленді.
Шара соңында қатысушылар мен жеңімпаздар ұйымдастырушылар тарапынан дайындаған дипломдармен және де естелік сыйлықтармен марапатталды.
Жұлдыз КЕНЖЕ
