ХАЛЫҚ  РИЗА БОЛСА, ЕҢБЕК  ТЕ МӘНДІ

Өткен жыл өтті. Не жасалды? Нәтижесі қандай? деген бағытта ел үшін еңбек етіп жүрген мекемелер ел алдында есеп беріп, келген 2025 жылға жоспар құрып,  жұмысқа да қызу кірісіп кетті.

Осы орайда біз де аудан тұрғындарының әлеуетін арттыруға еңбек етіп келе жатқан аудандық жұмыспен қамту және әлеуметтік бағдарламалар бөлімінің басшысы Айгүл Бижановамен әңгімелескен болатынбыз.

-Айгүл Оралбекқызы, өзіңіз жетекшілік етіп отырған мекеменің өткен 2024 жылғы атқарылған жұмыстарын оқырмандарымызға, жалпы аудан жұртшылығына хабардар етсеңіз?

-Өздеріңіз білетіндей, біздің бөлім бірнеше әлуметтік бағыттағы жоба, бағдарламаларды жүзеге асырумен айналысады. Соның ішінде өткен жылы мүмкіндігі төмен жандарға қандай көмек көрсетілгеніне тоқтала кетейін. Сөзімнің басын елімізде мүмкіндігі шектеулі жандар мен жасы келген зейнеткерлерге қандай жағдай қарастырылса, біздің ауданымызда да жағдайға қарай қызмет етіп жатқанымызбен бөліскім келеді. Бір қатарына тоқтала кетсем, негізінен мүгедектігі бар балаларды оңалту, күндізгі, арнаулы орталықтарына қатыстыру, мүгедектігі бар балалар мен қарт адамдардың отбасында тұруын ынталандыру, сондай-ақ қолдау орталықтарында қызмет  көрсету бағытын жандандыруды жалғастырып келеміз. Соңғы кездері әр өңірлерде үлкендерге демеу болар мелекеттік тапсырыс аясында «Белсенді ұзақ өмір сүру» орталығы жұмыс жасап келеді.  Біздің өлкемізде де 3 жылдан асты аудан орталығы Бадамшада үлкендеріміз игілігін көруде. Сондай-ақ,  мемлекеттік тапсырыспен «Инвотакси» қызмет етіп келеді.

Елімізде 2023-2027 жылдарға арналған объектілерді көбейту жоспары қолға алынды. Онда мүмкіндігі шектеулі жандар арнайы портал арқылы өздеріне қажеттінің бәріне тапсырыс бере алады. Жалпы алғанда жағдайы төмен жандардың әлеуетін көтеріп, еңбекке орналастырып, қоғамда өздерінің бар екенін сездіру үшін әлеуметтік бөлімдер аянбай еңбек етуде және де жетістігі де жетерлік.

-Олай болса аудандағы ересектер мен зағип жандарға өткен 2024 жылы қандай көмектер  көрсетілгені жөнінде айтып өтсеңіз?

-Жоғарыда айтып өткенімдей, біз де қолдан келгенше еңбектеніп жүрміз. Өткен жылдың соңғы айы желтоқсандағы қорытынды есеп бойынша, аталмыш топ санатындағы жандарға жасалған жұмыстарға тоқталып өтейін. Біздің ауданда 497 мүгедектігі бар адам тіркелсе, соның 34-і І топ, 188 адам  ІІ топ, 213 адам ІІІ топтағы зағип жандар  десек, оған қоса 65  мүгедектігі бар  бала есепте тұр. Өткен жылы жеке оңалту бағдарламаларына сәйкес мүгедектігі бар 465 адамға әлеуметтік қызметтер порты арқылы төмендегідей техникалық көмекші құралдар алынды. Оның ішінде 110 адамға протездік-ортопедиялық құралдар, 36 сурдотехникалық құралдар, 42 тифлотехникалық құралдар, 11 арнайы жүріп-тұру құралдары, 66 емделу мақсатында санаторлы-курорт, сонымен қатар 158 міндеттті гигиеналық құралдар, ал 25 адамға жеке көмекші қызметі көрсетіліп, 17 жанға ымдау тілі маманы қызмет көрсетті.

Сонымен қатар, 2024 жылдың  аяғында  Қарғалы ауданында мүгедек балаларды үйде оқытуға  жұмсалған шығындарды өтеу тәртібі мен мөлшерін айқындау туралы Қарғалы аудандық маслихатының 2023 жылғы 15 қарашадағы № 92 шешіміне сәйкес мүгедек балдарды үйде оқытуға жұмсалған шығындарын өтеу тәртібі бойынша 6 балаға 398 736 қаражат тағайындалып, төленді.

Өздеріңіз көріп отырғандай бұл бір жылғы көмек. Алдағы уақытта да көмек пен демеу бола бермек. Ең бастысы мүмкіншілігі төмен жандардың мүмкіндігін арттырып, өмірге үміт сыйлау біздің басты міндетіміз.

-Әңгімеңізге рахмет!

Әңгімелескен Бақыт  ИМАШЕВ