ЕКІ АЙЛЫҚ СЕНБІЛІК БАСТАЛДЫ

Өткен аптаның сенбісінде «Таза Қазақстан» республикалық акциясы аясында ауданымызда екі айлық тазалық науқаны бастау алды.

Айта кететін болсақ, 2022 жылы Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» акциясы еліміздің барлық аймақтарын қамтыған үлкен бастамаға айналып, бұл үрдіс 2024 жылы ауқымы кең әрі көп қырлы жаңа серпін алды.

Акцияның басты мақсаты — қоршаған орта мен тұрғындар үшін қолайлы жағдайларды қамтамасыз ету, азаматтық жауапкершілікті арттыру, экологиялық сана мен экологиялық мәдениетті қалыптастыру және нығайту мақсатында құрылған қоғамдық игілікке ұқыптылықпен қарау қағидаттарын қалыптастыру.

Сондай-ақ, бұған дейін аудан әкімі Нұрлыбек Унербаевтың төрағалығымен кезекті аппараттық жиналыс өтіп, онда
ауданымыз бен ауылдық елді мекендерді санитарлық тазалау және абаттандыру жұмыстарын ұйымдастыру, «Таза Қазақстан» республикалық екі айлық экологиялық акциясын өткізу мәселелері талқыланған еді.

Осы орайда өткен сенбі күні ауданымыз бен ауданға қарасты барлық округтерде  екі айлық экологиялық акциясы аясында сенбілік өтті.

Сенбілікке мекеме қызметкерлері мен еріктілер және де  аудан тұрғындары белсенділік танытып, белгіленген аймаққа тазалық жұмыстарын жүргізді. Нәтижесінде көшелер, саябақтар, аулалар мен қоғамдық орындар қоқыстан тазартылып, қалдықтар арнайы техникамен тиісті жерге шығарылды.

Еске сала кететін болсақ, бұл экологиялық шара әр апта сайын жалғасын таппақ. Тазалық — табалдырықтан басталатынын ескерсек, әрбір тұрғын үйдің, елді мекеннің тазалығы, сәулетті ажары ауыл тұрғындарының жанашырлығына байланысты. Сондықтан да, тазалыққа кез келген адам бей-жәй қарамау керек.

Қарғалы-АҚПАРАТ