ДАРИЯ — ӘМБЕБАП МАМАН

Қазақта ер жігіт «сегіз қырлы, бір сырлы» болса жарасады деп жатады ғой. Қыздарымыздың да осындай  сипатқа бейімі баршылық. Алыстан іздемей-ақ Шәмші ауылының әмбебап маманы —  Дария Қияашқызын айтуға болады. Ол осындай жан-жақтылығымен, ақадал еңбегімен еңбекқор ана, қоғам белсендісі.

Дария Дуисмаганбетова  1958 жылы кезіндегі Ақтөбе қаласындағы Ақтөбе ауданы Зария ауылында дүниеге келген. Кейіннен отбасы Петропавл ауылына қоныс аударып, 1965-1975 жылдар аралығында мектеп бітіреді. Кеңестік кезінде мектеп бітіргендер 2 жыл жұмыс жасауға міндеттелген тұста,  Дария да кезіндегі В.И.Пацаев атындағы совхозға комсомол жастар бригадасында сауыншы болып жұмыс жасай жүріп, қыста тракторист мамандығын оқып алады.

1976 жылы осы совхоздың құрылыс бригадасында тракторист болып та еңбек еткен. Жас қыздың алғырлығына риза болған совхоз басшылығы Ресейдің Орынбор қаласындағы Покровский атындағы ауыл шаруашылығы техникумына жолдама береді.

Одан соң 1978 жылы техникумды ойдағыдай бітіріп, осы совхозда бригадир-зоотехник болып қызмет етеді. Бригаданың жетістікке жетуіне себепші, өз ортасына сыйлы маманның еңбегін бағалаған ауылдастары 1980 жылы облыстық Кеңестің депутаттығына сайлап, іскер маман ел сенімінен шыға білді. Осылайша, өзінің алғырлық қабілетін әріптестеріне таныта жүріп,  бес жыл ауылдастарының мүддесі үшін еңбек етті. Содан кейін  сенімге ие алғыр маманға совхоздың кәсіподақ ұйымына төрағалық қызметі тапсырылды.       1985-1988 жылдар аралығында ауылдағы сақтық кассасында бақылау қызметінде атқарады. 1998 жылы қыркүйек айында В.И.Пацаев атындағы орта мектебіне кітапханашы болып орналасады. Міне, сөйтіп шаруашылық саласы мен кітапхана жұмысының ара жігін ажырата білген Дария Ақтөбе қаласындағы мәдени ағарту техникумының «Кітапханашы» факультетін сырттай оқып, кітапхана ісінің маманы болып шыға келеді.

Жұмыс пен оқудан қол үзбей, 2005 жылы Махамбет Өтемісов атындағы Батыс Қазақстан мемлекеттік университетін есейген шағында осы кезге дейінгі іс-тәжірибе мен көрген-білгенін көңілге түйгенінің арқасында қызыл дипломмен бітіреді. Кітапхана қызметінен зейнетке шығады. Еңбегіне қарай атақ абыройы мен сый-құрметі де, жетістіктері де жетерлік әмбебап маман. Сонымен қатар, әркімнің еңбек жолымен қатар өмір жолы сайрап жатады. Дария өмір жолында да шыңдалып, ащының дәмін татқан ана. Көпті  көрген, пейілі кең ана туған сіңілісі 37 жасында аты жаман аурудан қаза болып, артында қалған қызы Эльвираны бауырына басып, мейірімін төгіп өз қызы Салтанатпен қатар жеткізеді.

Жолдасы Марат Нурадинұлы екеуі бала-шағасын тәрбиелеп отырған қарапайым отбасы. Бүгінде екі дәуірде еңбек еткен жандар зейнет жасында. Зейнеткерміз демей, тіршілік тізгінін ұстаған отбасы ауылдан заманауи талапқа сай дүкен ашады. Кейіннен  немере бағып, оларды  оқыту мақсатында қаламен екі ортада жүрген соң, кәсіпкерлік шаруасын күйеу баласы Медет пен қызы Салтанатқа аманаттайды. Қыста қалада, жазда таза ауаны тыныстап, қара шаңырақта болады. Ұл-қыздары білім алып, қазір білікті маман ретінде қызмет жасап жатыр.

«Тектіден текті туар» дегендей, кейіпкеріміз жолдасы екеуі немерелері мен жиендерінің қуанышына бөленіп, ата мен әже бақытына кенеліп отыр.

Бақыт ИМАШЕВ