Аудандық мәслихаттың кезекті отырысы өтті
Ағымдағы жылдың 21 ақпан күні аудан әкімдігінің мәжіліс залында аудандық мәслихаттың кезекті 29-шы сессия отырысы өтіп, онда өзекті мәселелер қаралды.
Сессияға аудан әкімі Нұрлыбек Унербаев, аудандық мәслихат депутаттары мен ауылдық округ әкімдері, қоғамдық ұйымдар, аудан әкімдігі бөлімдері мен ұйым басшылары қатысты.
Отырысқа аудандық мәслихаттың төрағасы Сапарбек Аманжолов төрағалық етіп, күн тәртібіндегі мәселелермен таныстырып өтті.
Күн тәртібінде аудандық мәслихат төрағасының атқарылған жұмыстары бойынша есебі, Қарғалы аудандық мәслихатының 2024 жылғы 20 желтоқсандағы №253 «2025-2027 жылдарға арналған Қарғалы аудандық бюджетін бекіту туралы» шешіміне өзгерістер енгізу, «Қарғалы ауданының Құрметті азаматы» атағын беру, аудандық мәслихаттың 2015 жылғы 6 қарашадағы №362 «Сыбайлас жемқорлыққа қарсы іс-қимыл жөніндегі аймақтық комиссия құрамын бекіту туралы» шешіміне өзгерістер енгізу, аудандық мәслихаттың 2015 жылғы 5 маусымдағы №304 «Аудан әкімдігі жанындағы құқық бұзушылықтың алдын алу жөніндегі ведомствоаралық комиссияның құрамын бекіту туралы» шешіміне өзгерістер енгізу, аудандық мәслихаттың 2023 жылғы 27 желтоқсандағы №111 «Қарғалы аудандық сайлау комиссиясының мүшелерін сайлау туралы» шешіміне өзгерістер енгізу туралы 6 мәселе қаралды.
Ең алдымен аудандық мәслихаттың төрағасы Сапарбек Аманжоловтың 2024 жылы атқарылған жұмыстары туралы есебі тыңдалды. Одан соң күн тәртібіне ұсынылған мәселелер бойынша аудандық экономика және бюджеттік жоспарлау бөлімінің басшысы Шахнияз Сақабаевтың, аудан әкімі аппаратының басшысы Қуантай Бишеновтың хабарламалары тыңдалды. Аудандық мәслихат депутаттары хабарламаларды тыңдап, толғандырған сауалдарын жолдап, жергілікті өкілді және атқарушы органдардың жақсы бірлескен жұмысын атап өтіп, өз ұсыныстарын енгізіп, дауысқа салу нәтижесімен тиісті шешімдер қабылданды.
Сондай-ақ сессияда аудандық бюджеттегі өзгерістер, аудандық сайлау комиссиясының, сыбайлас жемқорлыққа қарсы іс-қимыл жөніндегі өңірлік комиссияның, аудан әкімі жанындағы құқық бұзушылықтардың алдын алу жөніндегі ведомствоаралық комиссияның құрамына өзгерістер енгізілді.
Сессия соңында аудан әкімі сөз сөйлеп, жоспарлардың орындалуы мен жұмыстардың нәтижелі аяқталуына бірлесе жұмыс жасауға шақырды.
Қарғалы-АҚПАРАТ
