Әке жолын жалғаған отбасы

 Елімізде 2022 жылы бастау алған “Ауыл аманаты” бағдарламасының ауылдықтарға шапағаты мол. Жұмыссыздарға жол ашып, түрлі мамандық иелері қосымша табыс көзіне айналдыруда.

Солардың бірі Бадамша ауылының тұрғыны, жарасымды отбасы  Ақылжан мен Жанбота жайлы сөз етпекпіз.

Ақылжан ұстаздық етсе, зайыбы қос дипломды медицина саласының қызметкері. Сөз басын кейінгі ұрпақтарына өнгелі іс қалдырған әкесі Жолшара мен анасы Алимадан бастасақ.

Ата-анасы тыл еңбеккерлері. Олар 7 баланы дүниеге әкелген қарапайым еңбек адамдары. Ақадал еңбектерінің арқасында сол кездегі Кеңестік дәуірде ауыл шаруашылығына еңбегі сіңген жандар. Әкелерінің осындай ерен еңбегі бағаланып 1973 жылы ҚР ауыл шаруашылығы Министрлігінің Құрмет грамотасымен марапатталып,  сыйлыққа автокөлік алуы шынайы еңбегінің айғағы. Арттарына еңбек үлгісімен қатар 7 ұрпақ қалдырса, бәрі де қоғамда өз орынын тапқан үлгі тұтарлық азаматтар. Қазіргі таңда олардан  24  немере мен 4 шөбере өсіп өнуде. Біздің кейіпкеріміз  Ақылжан сол жеті баланың ортасындағы ең кенжесі.

Ақылжан Жолшараұлы 1986 жылы шілде айында Әйтеке би ауданында дүниеге келген. Әке-шешесінің Бадамша ауылына қоныс  аударуына байланысты 2009 жылы №2 Бадамша орта мектебін бітіріп, сол жылы Қ.Жұбанов атындағы Ақтөбе өңірлік университетінің «Дене шынықтыру және спорт» мамандығына оқуға түседі. Аталмыш оқу орынын тәмамдаған соң жас маман ең алғашқы еңбек жолын Бадамша мектеп-бөбекжай-бақшасында алғашқы әскери дайындық пәнінің мұғалімі болып бастайды.

Еліміздегі спорт саласының дамуына қосқан үлесі үшін  аудан әкімінің Құрмет грамотасымен және де «Қазақстан мәдениет, спорт, туризм және ақпарат қызметкерлерінің салалық кәсіптік одағы» ҚБ Ақтөбе облыстық филиал төрағасының Алғыс хатымен марапатталған. Өңіріміздегі салауатты өмір салтын ұстану бағытындағы еңбегі айтарлықтай зор ұстаз.

2023 жылы «Қазақстан барысы» республикалық турнирдің аудандық іріктеу кезеңінде қатарынан озық көрініп 1 орын иеленген. Зайыбы Жанбота Садирбекқызы жоғары білімді медицина саласының маманы, гигиенист-эпидемиолог маман. Сондай-ақ, 7 жыл аудандық  санитариялық-эпидемиологиялық бақылау басқармасында еңбек еткен. Қазіргі уақытта аудандық аурухананың статистика бағытындағы маманы. Жолдасы екеуі 2 қыз бен 1 ұлдың анасы, қоғам белсендісі.

Жоғарыда айтқанымыздай қос жоғары білімді маман ақылдаса келе ата кәсіп мал басын өсіру мақсатында 2024 жылы «Ауыл аманаты» бағдарламасына қатысып, жобалары қолдау тауып, жылқы малын өсіруді қолға алады. Қазір жылқылары да бағымда бапталуда, оған қоса 200 гектар жер де алған. Келешекке бет бұрған отбасы алдағы уақытта жерді пайдаланып, жылқымен қатар сиыр малын өсіруді жоспарлап қойған.

Біз де «Ауыл аманатына» сеніммен қараған ауыл жастарының еңбектері еселеп артып, ауылға бет бұрар жастарға көрсеткен өнегелі бастамалары үшін алғыс айтамыз.

Бақыт ИМАШЕВ