ТАЗАЛЫҚҚА ДА ТАЛАП КЕРЕК

 Қоғамда күннің аптап ыстығында, аңызақ желінде, қақаған қысы мен жаңбырлы, батпақ күндерінде тазалыққа талаппен қарайтын тазалықшылардың еңбегі ақадал. Сондай адал еңбегімен, биік адами қасиетімен ерекшеленіп, құрметке бөленіп жүрген жандардың бірі – Тамара Ахметова.

        Биылғы жыл жұмысшы мамандықтарының жылы болғандықтан да, өз үйінің ауласын тазалауға ерінетін жандарға, қарапайым тазалықшының еңбегі  көпшілікке  үлгі боларлықтай. Олай болса, бүгінгі біздің кейіпкеріміздің мектепте жасаған қызметін есептегенде, ұзақ жыл бойы тазалықпен айналысып,  ел қатарлы қоғамға өзіндік үлес қосып келе жатырған қарапайым еңбек адамы.

Ол 1964 жылы сәуір айында (кезіндегі Жезқазған) қазіргі Ұлытау облысы  Ақтоғай ауданында дүниеге келген. Отбасындағы 8 баланың үшіншісі. Әкесі Балқаш көлінде балықшы, анасы балық комбинатында лаборант болып қызмет еткен.

Тамара Қонысбайқызы өзі өскен Ақтоғай аудандық мектебінен 10 сыныпты аяқтаған соң Балқаш медициналық училищесіне түседі. Одан кейін 1986 жылы Ақтөбе қаласының азаматы Темирхан Кенжебаевпен отау құрып, отбасы жағдайына байланысты оқуын жалғастыра алмай қалады. Өмір жолын жаңа бастаған кезде жолдасы Темирхан автокөлік жүргізушісі болып еңбек етсе, өзі бала тәрбиесі, үй шаруасымен айналысады.

Кейіннен 1987-1993 жылдар аралығында Талдыбұлақ елді мекенінде шопан болып қызмет етеді. Дәм айдап қазіргі құтты мекені болған Бадамша ауылына  1993 жылы қоныс аударады. Алайда, сол жылы жолдасы Темирхан дүниеден өтіп, 4 баланы жеткізу жауапкершілігі бір өзіне қалады.

Қанша қиыншылық көргенімен, өмірден еш мойымай, өмір ағысына қарсы жүзе білген кейіпкеріміз сол кезде-ақ Бадамша орта мектебіне тазалықшы болып қызметке орналасады. Содан 2000 жылға дейін сол жерде  жұмыс жасайды.

Қазіргі уақытта жұмыссыздар санатына тіркелген Тамара 12 жыл қоғамдық жұмыста тазалықшы болып еңбек етіп келеді. Жалпы мектептен басталған тазалықшылық қызметін қоссақ 30 жылдан бері аталмыш жұмысты аброймен атқарып келе жатқан нағыз еңбекқор жан деуге болады.

«Еңбек бәрін де жеңбек» деген қазақта жақсы сөз бар. Расында адал еңбек етіп, ұрпағына адал ас ішкізген адамның қашанда айы оңынан туып, өмірі шаттықты, күні жарық болмақ. Сол қарапайым болмысы мен адал еңбектің арқасында ұл-қызы ер жетіп, бүгінде бәрі отбасылы. Сондай-ақ, бір баласы қолында, кіші ұлымды аяқтандырсам деген ана, екі қыз бен  бір ұлдан көрген 6 немеренің сүйікті әжесіне айналып отыр. Оған қоса бейнетті еңбектің зейнетін  көретін күн де алыс емес.

Қазақта «Қарапайым адам – қасиетті адам» деген қастерлі сөз бар. Ендеше, сол қарапайымдылықты бойына ту еткен еңбекқор жанның зейнетке де абыройлы жетуіне тілекшіміз.