Кітапханашылар — мәртебелі мамандық иелері
Рухани білімнің, рухани мәдениеттің ордасы – кітапхана ешқашан мәні мен маңыздылығын жойған емес. 2022 жылғы 18 қазандағы ҚР Үкіметінің №833 қаулысымен «24 қазан – Кітапханашылар күні» мерекесі болып бекітілді.
Кітап пен кітапхананың тіршілігіне жан беретін, ұлттық құндылықтар мен оқырмандар арасын жалғастырушы – кітапханашылар. Қасиетті қазынамызды көздің қарашығындай сақтап, насихаттап, ел игілігіне жаратып жүрген кітапханашылар – ең қажетті де абыройлы мамандық иелері.
Осы орайда 22 қазан күні аудандық мәдениет үйінде мәртебелі мамандық иелеріне арналған салтанатты шара өтті.
Шараға ауданымыздағы және де ауылдық округтердегі барлық кітапханашылар қатысты. Мерекелік кеште аудан әкімінің орынбасары Ержан Есімбаев сөз сөйлеп, көркем ой құндылықтарын ұрпақтан-ұрпаққа жалғастырып, рухани іс тындырып келе жатырған кітапханашыларымыздың қызметтеріне шығармашылық шабыт тілеп, оқырмандардың ықыласына бөлене берулеріне тілектестігін жеткізді. Іс-шарада кітапхана ісінің дамуына айрықша үлес қосып, белсенділік танытқан бірқатар кітапханашылар марапатталып, бағалы сыйлықтар табыс етілді. Ал аудандық балалар кітапханасының меңгерушісі Жанна Мусинаға ҚР Ұлттық кітапханасының директоры, Қазақстандық кітапханалық одақтың төрайымы Бақытжамал Оспанованың «Қазақстанның құрметті кітапханашысы» төсбелгісі табыс етілді.
Сондай-ақ, мерекеге орай мәдениет және кітап ісі саласын дамытуға қосқан үлесі мен қажырлы қызметі үшін аудандық орталықтандырылған кітапхана жүйесінің әдіскері Анар Байсеупова Қазакстан Республикасының мәдениет және ақпарат министрі Аида Балаеваның Құрмет грамотасымен, кітапхана директоры Нұргүл Мысаева Ақтөбе облысының әкімі Асхат Шахаровтың Алғыс хатымен марапатталды.
Расымен де, қоғамның дамуында, жастарды тәрбиелеуде, мәдениетімізді сақтауда кітапханашылардың атқарып жатқан қызметі өлшеусіз.
Сондықтан да, кітапхана қазіргі кезде жастардың рухани өміріне, жақсы бастамалар мен жарқын болашаққа жол ашып жатқан білімнің шырақшысына айналып келеді. Сонымен қатар, жыл сайын әр түрлі акциялар мен жобалар аясында ақын-жазушыларымыздың мұрасы насихатталып, білімді ұрпақ пен жасампаз қоғам қалыптастыру жолындағы еңбектері ұшан-теңіз.
Қарғалы-АҚПАРАТ
